Azərbaycanda fəaliyyət göstərən 21 bank və xarici bank filialı 2026-cı ilin yanvar-sentyabr aylarında cəmi 1 milyard 81 milyon 773 min manat xalis mənfəət əldə edib. Bu, bir il əvvəlki göstəricidən 170 milyon 480 min manat (18,7 faiz) çoxdur, lakin artımın böyük hissəsi yalnız iki bankın payına düşür.
Sektorun mənfəət artımında əsas rolu Azərbaycan Beynəlxalq Bankı (ABB) və Kapital Bank oynayıb. Bu iki bankın birgə xalis mənfəət artımı 158 milyon 930 min manat təşkil edib ki, bu da bütün sektordakı 170,5 milyon manatlıq artımın 93,2 faizinə bərabərdir. Qalan 19 bankın cəmi mənfəət artımı isə yalnız 11 milyon 550 min manat olub.
21 bankdan 16-sı keçən ilin müvafiq dövrü ilə müqayisədə mənfəətini artırıb, 5 bankda isə azalma müşahidə edilib. Mənfəət məbləğinə görə liderlik ABB, Kapital Bank və PAŞA Bank arasında bölünüb — bu üç bank birlikdə 783 milyon 183 min manat, yəni ümumi mənfəətin 72,4 faizini əldə edib. Müqayisə üçün, bir il əvvəl bu pay 68,4 faiz idi.
Liderlər və artım tempi
ABB-nin xalis mənfəəti 261 milyon 323 min manatdan 352 milyon 377 min manata, yəni 34,8 faiz artaraq sektorda ən yüksək göstərici olub. Kapital Bank isə 229 milyon 129 min manatdan 297 milyon 4 min manata çataraq 29,6 faiz artım nümayiş etdirib. Bu iki bankın birgə mənfəəti 649 milyon 381 min manata, yəni ümumi göstəricinin 60 faizinə çatıb.
Üçüncü sırada yer alan PAŞA Bankın mənfəəti isə demək olar ki, sabit qalıb — 132 milyon 837 min manatdan 133 milyon 802 min manata, cəmi 0,7 faiz yüksəlib. Dördüncü və beşinci yerləri tutan Bank Respublika (50 milyon 285 min manat, 16,5 faiz artım) və AccessBank (45 milyon 246 min manat, 27 faiz artım) ilk beşlikdəki digər oyunçular olub. İlk beş bankın birgə mənfəəti 878 milyon 715 min manata, yəni ümumi göstəricinin 81,2 faizinə bərabərdir.
Mənfəətini ən sürətlə artıran bank isə Unibank olub — bankın göstəricisi 15 milyon 421 min manatdan 26 milyon 610 min manata, yəni 72,6 faiz yüksəlib. Expressbank (65,1 faiz), Azər Türk Bank (61,8 faiz) və AFB Bank (59,2 faiz) da yüksək artım tempi göstərən banklar sırasına düşüb, baxmayaraq ki, bu bankların mütləq mənfəət artımı iri banklarla müqayisədə xeyli kiçikdir.
Mənfəəti azalan banklar
Ən böyük geriləmə Xalq Bankda qeydə alınıb — bankın mənfəəti 51 milyon 541 min manatdan 24 milyon 73 min manata, yəni 53,3 faiz düşüb. Yelo Bankın mənfəəti 30,5 faiz, Bank Avrasiyanın 30 faiz, Bank Melli İranın Bakı filialının 28,2 faiz, Bank VTB (Azərbaycan)ın isə 26,8 faiz azalıb. Bu beş bankın birgə geriləməsi təxminən 40 milyon 791 min manat təşkil edib və sektorun ümumi artım tempini məhdudlaşdırıb.
Həmçinin oxuyun: Bank of Baku 9 ayda xalis mənfəətini 27 milyon manata çatdırıb
