EXPO 2030 Riyadh-ın Business Wire vasitəsilə yaydığı mətbuat bəyanatına görə, Azərbaycan Bakıda EXPO 2030 Riyadda iştirak müqaviləsini imzalayıb. Sənəd prezidentin köməkçisi Anar Ələkbərov və EXPO 2030 Riyadh-ın baş icraçı direktoru Talal əl-Marri tərəfindən imzalanıb.
Bəyanata görə, imzalama mərasimi Bakıda keçirilib və Azərbaycanın planlaşdırma mərhələsindən sərgidə faktiki iştiraka keçidini təmin edən mühüm addım kimi təqdim olunub. Bəyanatda qeyd olunur ki, sənədin məhz Bakıda imzalanması Azərbaycan-Səudiyyə Ərəbistanı arasındakı uzunmüddətli dostluq əlaqələrini və Azərbaycanın bu əməkdaşlığı dərinləşdirməyə verdiyi önəmi əks etdirir.
Prezidentin köməkçisi Anar Ələkbərov bildirib ki, müqavilənin Bakıda imzalanması Azərbaycan üçün böyük şərəfdir. Açıqlamasında Ələkbərov Azərbaycan və Səudiyyə Ərəbistanı arasında siyasi, iqtisadi, enerji və mədəniyyət sahələrində sıx əməkdaşlığın mövcud olduğunu vurğulayıb və ölkəsinin pavilyonu vasitəsilə dünya ictimaiyyətinə irsini, mədəniyyətini və gələcəyə baxışını təqdim etməyi planlaşdırdığını deyib.
EXPO 2030 Riyadh-ın baş icraçı direktoru Talal əl-Marri isə bildirib ki, sərginin beynəlxalq iştirakçıları getdikcə təsdiqlənmə mərhələsindən pavilyonlarının planlaşdırılmasına keçir. Onun sözlərinə görə, Azərbaycanın imzaladığı müqavilə bu prosesdə daha bir mühüm mərhələdir və təşkilatçılar Azərbaycan tərəfdaşları ilə sıx əməkdaşlığa hazırdır.
EXPO 2030 Riyadh haqqında
Bəyanatda bildirilir ki, “Foresight for Tomorrow” (Sabah üçün uzaqgörənlik) devizi altında keçiriləcək EXPO 2030 Riyadh 1 oktyabr 2030-cu ildən 31 mart 2031-ci ilədək davam edəcək. Sərginin 6 milyon kvadratmetrlik ərazisində 197 rəsmi iştirakçı təmsil olunacaq və beş fərqli rayonda 42 milyon ziyarət gözlənilir.
Bəyanatda qeyd olunur ki, sərginin Ətraflı Baş Planı artıq tamamlanıb və ərazi hazırlığı, torpaq işləri, infrastruktur və kommunal şəbəkələr üzrə işlər davam edir.
