Azərbaycanın növbəti il üçün hazırlanan dövlət büdcəsi layihəsinə görə, işçilərin maaşlarına yönəldiləcək vəsait 11 milyard 891,3 milyon manata çatacaq. Bu rəqəm cari ilin göstəricisini 16 faiz üstələyir.
2027-ci il üçün dövlət büdcəsi haqqında hazırlanan qanun layihəsində əmək haqqı xərclərinin 11 milyard 891,3 milyon manat həcmində planlaşdırıldığı qeyd olunur. Sənəddə bu maddə ilə yanaşı, büdcənin digər xərc istiqamətləri üzrə də konkret rəqəmlər əks olunub.
Belə ki, sənədə görə qrant və sair ödəniş növlərinə 3 milyard 409,1 milyon manat nəzərdə tutulub ki, bu da cari ilin göstəricisindən 3,1 faiz yüksəkdir. Sosial xarakterli ödənişlər üçün isə 3 milyard 462 milyon manat ayrılacaq, həmin rəqəm cari illə müqayisədə 0,7 faiz artım göstərir.
Layihədə həmçinin dövlət tərəfindən icbari şəxsi sığorta üçün 59,1 milyon manat vəsait nəzərdə tutulduğu bildirilir. Bundan əlavə, qeyri-maliyyə aktivlərinin əldə edilməsi məqsədilə 12 milyard 797,2 milyon manat, maliyyə aktivləri ilə bağlı əməliyyatlara isə 1 milyard 2,8 milyon manat xərclənəcək.
Öhdəliklər çərçivəsində aparılacaq əməliyyatlara ayrılan məbləğ 1 milyard 200,7 milyon manat təşkil edəcək ki, bu da cari ilə nisbətən 11,5 faiz artım deməkdir.
