Bakıda yanğın-xilasetmə idmanı üzrə kişilər arasında XXI, qadınlar arasında XII dünya çempionatı başa çatıb. Komanda hesabında hər iki yarışda Rusiya Federasiyası qalib gəlib, Belarus Respublikası ikinci, Qazaxıstan Respublikası isə üçüncü pillədə qərarlaşıb.
Yarışların bağlanış mərasimi Azərbaycan Respublikasının Fövqəladə Hallar Nazirliyi ilə Yanğınsöndürənlərin və Xilasedicilərin Beynəlxalq İdman Federasiyasının ortaq təşkilatçılığında keçirilib. Tədbir Azərbaycanın Dövlət Himni ilə başlayıb, qonaqlar çempionatın maraqlı anlarından ibarət video çarxa baxıblar.
Fövqəladə Hallar Nazirinin müavini general-mayor Yusif Nəbiyev mərasimdə söz alaraq, yanğın-xilasetmə idmanının əməkdaşların fiziki və peşəkar bacarıqlarının inkişafına verdiyi töhfəni vurğulayıb. O, idmançıların nümayiş etdirdiyi dözümlülük və komanda birliyini yüksək dəyərləndirib, belə tədbirlərin ölkələr arasında dostluq əlaqələrinin güclənməsinə də kömək etdiyini bildirib. Nəbiyev yarışın təşkilinə dəstək verən qurumlara öz minnətdarlığını ifadə edib.
Qalib komandalara mükafatlar verilib
İlk olaraq qadın komandaları arasında birinci yerləri tutanlar təltif edilib, bunun ardınca Rusiya Federasiyasının himni oxunub. Mükafatlar qadın komandaların baş məşqçilərinə də təqdim olunub.
Daha sonra kişi komandaları arasında qaliblər mükafatlandırılıb, Rusiya Federasiyasının himni yenidən səslənib. Kişi komandalarının məşqçiləri də öz mükafatlarını alıblar.
Mərasim çərçivəsində çempionatın bayrağının təhvil-təslim mərasimi baş tutub. Yanğınsöndürənlərin və Xilasedicilərin Beynəlxalq İdman Federasiyası İcraiyyə Komitəsinin direktoru Andrey Kalinin çıxışında Azərbaycan tərəfinin göstərdiyi qonaqpərvərliyə görə təşəkkürünü bildirib.
Bayrağı general-mayor Yusif Nəbiyev Belarus Respublikasının fövqəladə hallar naziri birinci müavini, daxili xidmət polkovniki Sergey Lapanoviçə təhvil verib. Öz növbəsində Lapanoviç də Azərbaycan tərəfinə minnətdarlıq sözləri deyib.
Federasiyanın prezidenti Aleksandr Çuprian çıxış edərək yarışların yüksək səviyyədə təşkil olunduğunu vurğulayıb və Bakıdakı dünya çempionatının başa çatdığını elan edib. Federasiya həmçinin Azərbaycan Fövqəladə Hallar Nazirliyinin bir qrup işçisinə əməkdaşlıq əlaqələrinin inkişafındakı xidmətlərinə görə medallar verib.
Tədbirdə 8 Noyabr Zəfər Gününə həsr olunmuş video nümayiş etdirilib. Bağlanış mərasimi konsert proqramı ilə tamamlanıb.
