Milli Məclis fərdi qaydada, muzdlu işçi cəlb etmədən çalışan kuryerlər üçün aylıq 15 manat məbləğində sadələşdirilmiş vergi müəyyən edən Vergi Məcəlləsinə dəyişikliyi ilk oxunuşda qəbul edib.
Dəyişiklik layihəsinə əsasən, sifarişləri avtomobil, motosiklet, velosiped və ya skuterlə çatdıran bu kateqoriyadan olan kuryerlər vergi öhdəliklərini sabit qəbz vasitəsilə yerinə yetirəcəklər. Təklifin məqsədi həm vergi ödəyiciləri, həm də vergi orqanları üçün uçot və hesabatlılıq prosesini sadələşdirməkdir.
Layihənin əsaslandırılmasında bildirilir ki, elektron ticarətin genişlənməsi ilə kuryer xidməti son illərdə sürətlə böyüyüb və bu sahədə əsasən muzdlu işçi cəlb etmədən fəaliyyət göstərən fiziki şəxslər çalışır. Bu şəxslərin əksəriyyətinin gəlir-xərc uçotu aparmaq və vergi hesabatı təqdim etmək vərdişi olmadığından, mövcud inzibati tələblər onları qeyri-rəsmi fəaliyyətə sövq edib.
Sənəddə qeyd olunur ki, sabit aylıq ödəniş modeli vergi nəzarətini asanlaşdırmaqla yanaşı, sektor üzrə dövriyyənin daha şəffaf uçotuna şərait yaradacaq. Bununla da qeyri-rəsmi işləyən kuryerlərin rəsmi fəaliyyətə keçidi təşviq olunacaq, sahibkarların mühasibatlıq və əməliyyat xərcləri isə azalacaq.
Təklif parlamentin plenar iclasında səsə qoyularaq ilk oxunuşda dəstəklənib.
