Sakit okeanda suyun qızması ilə bağlı El-Ninyo hadisəsinin ABŞ-ın Kaliforniya ştatına bu qış külli miqdarda maddi ziyan vurması gözlənilir. Təbii fəlakət risklərini qiymətləndirən mütəxəssislər bunu bildiriblər.
“Google Ventures” şirkətinin dəstəklədiyi “Climate X” analitik qurumunun hesablamalarına görə, bu qış El-Ninyo nəticəsində Kaliforniyada baş verə biləcək daşqınlar və torpaq sürüşmələri 2-3 milyard dollar həcmində zərərlə nəticələnə bilər.
Qeyri-kommersiya təşkilatı olan “Climate Central”ın məlumatına görə, adətən Kaliforniyada daşqınların ştata vurduğu illik ziyan orta hesabla 500 milyon dollar civarında olur. Bu isə El-Ninyo ilə bağlanan proqnozlaşdırılan zərərin adi göstəricidən əhəmiyyətli dərəcədə yüksək olacağını göstərir.
Ştat rəhbərliyi bundan əvvəl güclü fırtına təhlükəsi ilə bağlı Kaliforniyada fövqəladə vəziyyət rejimi elan edib.
El-Ninyo Sakit okeanın ekvator bölgəsində su temperaturunun qeyri-adi şəkildə yüksəlməsi ilə müşayiət olunan təbii proses hesab edilir. Bu hadisə nəticəsində temperatur rejimi və yağıntı miqdarında ciddi dəyişikliklər baş verə bilər.
