Rusiyanın «İnterfaks» agentliyi yazır ki, Prezident İlham Əliyevin sözlərinə görə, Azərbaycan özünün və xaricdəki müəssisələrin hesabına ildə 30 milyon ton neft emalı gücünə malikdir, geosiyasi gərginlik fonunda isə ölkənin neft məhsullarına və qazına tələbat daha da artacaq.
Agentliyin məlumatına görə, dövlət başçısı bu fikirləri Yeni Azərbaycan Partiyasının VIII qurultayındakı çıxışında səsləndirib. Onun sözlərinə görə, bugünkü geosiyasi və iqtisadi reallıq ondan ibarətdir ki, bir sıra ölkələr enerji ehtiyatlarını əvvəlki kimi əldə edə bilmir, Azərbaycan isə xam neft, neft məhsulları, təbii qaz, elektrik enerjisi, neft-kimya məhsulları və gübrə istehsal edib ixrac edən nadir ölkələrdən biri olaraq qalır.
İnterfaks İlham Əliyevin sözlərini sitat gətirərək yazır ki, dünyada davam edən böhran əsasən neft məhsulları tədarükü ilə bağlıdır və vəziyyət gələcəkdə daha da ağırlaşa bilər. Prezidentin sözlərinə görə, bəzi ənənəvi təchizatçılar artıq daxili tələbatı ödəmək üçün ixracı dayandırmaq məcburiyyətində qalır, bir çox ölkədən isə Azərbaycana istehsal etdiyi neft məhsullarını onlara göndərmək xahişi ilə müraciətlər daxil olur.
Nəşr qeyd edir ki, dövlət başçısının sözlərinə görə, Azərbaycanın 30 milyon tonluq emal gücünün 7 milyon tonu ölkədəki zavodun, 23 milyon tonu isə Türkiyə və İtaliyadakı müəssisələrin payına düşür. İlham Əliyev bunu vaxtında görülmüş iş adlandıraraq bildirib ki, Türkiyədə bir zavod sıfırdan tikilib, İtaliyada isə iki zavod alınıb, üç ölkədə məcmu 30 milyon ton gücə malik olan dövlətlər isə az sayda qalıb.
Agentlik xatırladır ki, Dövlət Neft Şirkəti (SOCAR) 2025-ci ilin sentyabrında İtaliyanın API Holding-dən Italiana Petroli-nin 99,82 faiz səhmini əldə etmək barədə saziş imzalayıb, əməliyyat isə 2026-cı il mayın 8-də başa çatdırılıb. Dəyəri təxminən 3 milyard avro olan bu sövdələşmə SOCAR-a İtaliyada 4,6 mindən çox AZS-dən ibarət şəbəkə və iki zavod üzərində nəzarət verib. Türkiyədə isə SOCAR-ın payçısı olduğu Star zavodunun gücü ilkin 10 milyon tondan 13 milyon tona qədər artırılıb, buraya investisiya təxminən 7 milyard dollar təşkil edib.
