Bakının Sabunçu rayonunda yerləşən Bəşir Bünyadov küçəsinin müəyyən hissəsində bərpa işləri görüləcək, bu səbəbdən 21-24 oktyabr aralığında gecələr avtomobil hərəkəti tamamilə dayandırılacaq.
Azərbaycan Avtomobil Yolları Dövlət Agentliyi (AAYDA) açıqlayıb ki, Bəşir Bünyadov küçəsində aparılacaq təmir işləri avtomobil hərəkətinə müvəqqəti məhdudiyyət yaradacaq. Qurumun məlumatına əsasən, bərpa işləri küçənin Koroğlu metrostansiyası (Piramida istiqaməti) ilə Heydər Əliyev prospekti arasındakı sahəni, eləcə də Bakıxanov qəsəbəsinə gedən yolu əhatə edəcək.
Agentlik bildirib ki, məhdudiyyət üç ardıcıl gecə eyni cədvəl üzrə qüvvədə olacaq. Belə ki, hərəkət 21 oktyabrdan 22 oktyabra, 22 oktyabrdan 23 oktyabra və 23 oktyabrdan 24 oktyabra keçən gecələr saat 23:00-dan səhər 08:00-dək tamamilə bağlanacaq.
AAYDA sürücülərə tövsiyə edib ki, bu müddətdə başqa yollardan istifadə etsinlər, yolda ehtiyatlı hərəkət etsinlər və aparılan işlərə anlayışla yanaşsınlar.
