“TikTok” platformasında ucuz qiymətə avtomobil satışı adı altında onlarla vətəndaş aldadılıb. Zərərçəkənlərin bildirdiyinə əsasən, ümumi itki təxminən 300 min manata çatıb.
Aldadılan şəxslərin sözlərinə görə, onlar “TikTok” sosial şəbəkəsində cəlbedici qiymət və əlverişli şərtlərlə qoyulmuş avtomobil satışı elanlarına rast gəliblər. Avtomobil əldə etmək məqsədilə müəyyən məbləğdə qabaqcadan ödəniş edən insanlar bir müddət sonra aldadıldıqlarının fərqinə varıblar.
Bu barədə məlumatı Daxili İşlər Nazirliyinin mətbuat xidmətinin nümayəndəsi, polis baş leytenantı Lumu İsrəfilli yayıb. Onun sözlərinə görə, bu üsulla çoxsaylı vətəndaşların aldadılaraq dələduzluğa məruz qalması ilə əlaqədar hüquq-mühafizə orqanlarına çoxlu müraciət ünvanlanıb. Aşkarlanan faktlar üzrə Cinayət Məcəlləsinin uyğun maddəsi əsasında cinayət işi qaldırılıb.
Polisin apardığı əməliyyat-axtarış tədbirləri sayəsində bu cinayətlərdə iştirak etdiyi güman olunan iki şəxs aşkarlanıb və saxlanılıb. Məhkəmə qərarı ilə onların barəsində həbs qətimkan tədbiri tətbiq edilib.
Hazırkı mərhələdə cinayət işi çərçivəsində araşdırma tədbirləri davam etdirilməkdədir.
