“Cahan Holdinq”in marketinq departamentinin rəhbəri vəzifəsinə Müşviq İskəndərov təyin olunub.
2008-ci ildən marketinq sahəsində çalışan İskəndərov müxtəlif tanınmış şirkət və qurumlarda rəhbər vəzifələr tutub. Yeni təyinatından əvvəl o, holdinqə məxsus “ENNA”, “Cahan Sənaye Kompleksi” və “Cahan İnşaat” müəssisələrində marketinq direktoru olub.
“ENNA”da çalışdığı dövrdə “BUZZ Cola” markasının marketinq kampaniyası geniş maraq doğurub. İskəndərov həmçinin “BE Group” brendinin sıfırdan yaradılmasında iştirak edib. “Cahan İnşaat”ın “Tarixin mərkəzində” şüarı ilə təqdim etdiyi layihə isə Naxçıvanda böyük maraqla qarşılanıb.
1995-ci ildən fəaliyyət göstərən “Cahan Holdinq” 22 əsas və bir neçə törəmə şirkəti birləşdirir. Holdinq avtomobil biznesi və texniki xidmət, çay istehsalı, tikinti materialları və istilik sistemləri istehsalı, ticarət, turizm və tikinti sahələrində fəaliyyət göstərir, bir sıra tanınmış brendlərin rəsmi nümayəndəsidir.
