Bakıda keçirilən görüşdə Azərbaycanın baş komissarı Anar Ələkbərov ilə “EXPO 2030 Riyadh” sərgisinin icraçı direktoru Talal bin Hüseyn əl-Mərri ölkəmizin həmin beynəlxalq sərgidə təmsil olunmasını təsdiqləyən razılaşmaya imza qoyublar.
Bakıda baş tutan görüşdə imzalanan sənəd Azərbaycanın Səudiyyə Ərəbistanında keçiriləcək “EXPO 2030 Riyadh” sərgisinə hazırlığında mühüm addım kimi qiymətləndirilir. Prezident Administrasiyasının əməkdaşı, layihə üzrə Azərbaycanın baş komissarı Anar Ələkbərov bildirib ki, ölkəmiz ilə Səudiyyə Ərəbistanı Krallığı arasında əlaqələr qarşılıqlı dostluq, hörmət və sıx tərəfdaşlıq zəminində inkişaf edir.
O qeyd edib ki, iki ölkə arasında siyasi, iqtisadi, enerji və mədəniyyət sahələrində əməkdaşlıq ardıcıl şəkildə genişlənir. Ələkbərovun sözlərinə görə, Azərbaycanın sərgidə iştirakı bu tərəfdaşlığın əhəmiyyətini nümayiş etdirməklə yanaşı, Səudiyyə Ərəbistanının belə böyük miqyaslı beynəlxalq tədbirə ev sahibliyinə dəstəyin ifadəsidir.
Bildirilib ki, Azərbaycan pavilyonu dünyanın müxtəlif guşələrindən gələn qonaqlara ölkənin zəngin tarixi-mədəni irsini və inkişaf perspektivlərini tanıdacaq, eyni zamanda xalqlar arasındakı dostluq körpüsünü möhkəmləndirəcək.
Sərgiyə qoşulan ölkələrin sayı çoxalır
“EXPO 2030 Riyadh” sərgisinin icraçı direktoru Talal bin Hüseyn əl-Mərri bildirib ki, layihəyə beynəlxalq maraq getdikcə artır – iştirak qərarı verən ölkələr artıq öz pavilyonlarının inşasına və qonaqlar üçün proqramların hazırlanmasına başlayıblar. Onun sözlərinə görə, Azərbaycanla imzalanan razılaşma da bu geniş hazırlıq prosesinin bir hissəsidir.
Əl-Mərri əlavə edib ki, Riyaddakı EXPO sərgisi müxtəlif ölkə və xalqları bir araya gətirəcək, fikir mübadiləsinə şərait yaradacaq, əməkdaşlıq dairəsini genişləndirəcək və ortaq gələcəyin formalaşmasına töhfə verəcək yeni tərəfdaşlıqların yaranmasına imkan verəcək.
Qeyd olunub ki, Riyadda keçiriləcək Ümumdünya EXPO Sərgisi 2030-cu il oktyabrın 1-dən 2031-ci il martın 21-dək davam edəcək. Hazırda sərgi meydançasının qurulması və əsas infrastrukturun yaradılması istiqamətində işlər davam etdirilir.
