Əmək və Əhalinin Sosial Müdafiəsi Nazirliyi ilə Ümumdünya Səhiyyə Təşkilatının (ÜST) Azərbaycandakı Nümayəndəliyi arasında keçirilən görüşdə icbari tibbi sığorta və reabilitasiya sistemlərində idarəetmənin təkmilləşdirilməsi müzakirə olunub. Bildirilib ki, dövlət hesabına verilən reabilitasiya vasitələrinin növləri son illər 57-dən 130-a çatdırılıb.
Görüşdə əmək və əhalinin sosial müdafiəsi naziri Anar Əliyev ilə ÜST-nin Azərbaycandakı Nümayəndəliyinin rəhbəri Hande Harmancı iştirak edib. Nazir Prezident İlham Əliyevin tapşırıqları çərçivəsində son illər aparılan sosial islahatlar, o cümlədən əlillik və reabilitasiya sistemlərinin təkmilləşdirilməsi istiqamətində görülən işlər barədə məlumat verib.
Anar Əliyevin sözlərinə görə, reabilitasiya vasitələri ilə təminat sistemi ÜST-nin təsnifatına uyğunlaşdırılıb, bunun nəticəsində dövlət büdcəsi hesabına verilən vasitələrin növ sayı 57-dən 130-a qədər artırılıb.
Nazir bu nəticələrin əldə olunmasında ÜST ilə birgə fəaliyyətin xüsusi rolu olduğunu vurğulayıb və mövcud əməkdaşlıq təcrübəsinin gələcəkdə daha geniş miqyaslı işbirliyi üçün zəmin yaratdığını qeyd edib. O, həmçinin əhalinin icbari tibbi sığortası sahəsindəki islahatlar, innovativ həllərin tətbiqi və xidmətlərin əlçatanlığının artırılması üzrə görülən tədbirlər barədə də danışıb.
Öz növbəsində Hande Harmancı Azərbaycanda aparılan sosial islahatları və nazirliklə ÜST arasındakı əməkdaşlığı müsbət qiymətləndirib. Görüş zamanı tərəflər icbari tibbi sığorta sahəsində idarəetmənin təkmilləşdirilməsinə dair birgə iş imkanlarını da müzakirə ediblər.
