“Saudi Aramco”nun icraçı direktoru Amin Nasser qlobal bazarda neft tədarükü kəsilmələrinin qarşısını almaq üçün nəzərdə tutulan ehtiyat fondlarının çox aşağı həddə endiyini açıqlayıb. Onun sözlərinə görə, Hörmüz boğazındakı gəmiçilik fəaliyyəti normal rejimə qayıtmasa, neft bazarında ciddi sarsıntılar baş verə bilər.
Nasser bu vəziyyəti “təşvişə səbəb olacaq qədər aşağı” kimi təsvir edərək, bunun neft məhsullarının qiymətlərində sərt yüksəlişə yol aça biləcəyini bildirib. Onun fikrincə, dövlətlərin ehtiyat fondlarını bazara çıxarması vəziyyəti ancaq qısamüddətli rahatlaşdıra bilər, lakin tələb ilə təklif arasındakı uçurumu aradan qaldırmır.
Şirkət rəhbərinin açıqlamasına əsasən, hətta Hörmüz boğazı ilə neft daşınması tamamilə öz axarına düşsə də, dövlətlərin ehtiyat fondlarını köhnə səviyyəyə çatdırması üçün iki il kimi bir müddət tələb oluna bilər.
Nasserin sözlərinə görə, İsrail ilə ABŞ-ın İran ilə qarşıdurma dövründə şirkət xarici ərazilərdəki neft depolarına müraciət etməklə, həmçinin zərər görmüş qurğuları tez bir zamanda yenidən işə salmaqla tədarük zəncirinin kəsilməməsinə nail olub. Hazırkı mərhələdə “Aramco” ixrac prosesi üçün yeni yollar araşdırır, həmçinin xarici dövlətlərdə əlavə anbar tutumu yaratmağa cəhd göstərir ki, bununla da hər hansı bir ötürücü marşrutdan aşırı dərəcədə bağlılıq aradan qalxsın.
Qeyd olunub ki, Hörmüz boğazındakı çətinliklər dünya ərzaq bazarına da mənfi təsir göstərə bilər, zira planetin gübrə ehtiyatlarının təqribən üçdə bir hissəsi məhz həmin keçiddən ötürülür. Beynəlxalq Ticarət Palatasının baş katibi Con Denton bildirib ki, gübrə istehsalı və çatdırılması sahəsində mövcud imkanlar artıq təxminən 40 faiz kiçilib, dünya bazarı isə 2,7 milyon tona yaxın məhsul itkisi ilə üzləşib.
Daha əvvəl BMT tərəfindən də bildirilmişdi ki, Hörmüz boğazının bağlanması qlobal iqtisadiyyata və ərzaq təhlükəsizliyinə ağır zərbə vura bilər.
