Vaşinqton, Bakı və İrəvan Trampın Beynəlxalq Sülh və Tərəqqi üçün Marşrutu (TRIPP) təşəbbüsünün icrasını sürətləndirmək məqsədilə üçtərəfli texniki işçi qruplarının fəaliyyətə başladığını bildirib. Bu barədə üç ölkənin hökumətləri 6 noyabr tarixli birgə açıqlamada məlumat yayıb.
Açıqlamaya görə, TRIPP işçi qruplarının işinə ABŞ Dövlət Departamentinin Avropa və Avrasiya məsələləri üzrə köməkçi dövlət katibi Brendan Hanrahan, Ermənistanın xarici işlər nazirinin müavini Vahan Kostanyan və Azərbaycanın xarici işlər nazirinin müavini Elnur Məmmədov start verib.
Bəyanatda vurğulanıb ki, belə üçtərəfli əməkdaşlıq bölgədə uzunmüddətli sabitliyin, iqtisadi canlanmanın, qarşılıqlı bağlılığın və ticarət əlaqələrinin inkişafına xidmət edəcək. Bundan əlavə, qeyd olunub ki, görülən addım Prezident Donald Trampın vasitəçiliyi ilə 2025-ci ilin 8 avqustunda imzalanmış Sülh Sammiti Bəyannaməsinin tarixi əhəmiyyətini bir daha təsdiqləyir.
Nəqliyyat və enerji sahəsində iki ayrı qrup
Birinci mərhələdə tərəflər nəqliyyat, habelə elektrik enerjisinin ötürülməsi məsələlərini əhatə edən iki texniki planlaşdırma qrupunun formalaşdırılmasına dair razılığa gəlib. Qeyd edilib ki, bu qruplar mürəkkəb texniki məsələlərin həllinə kömək etməklə yanaşı, layihənin növbəti mərhələlərinə, o cümlədən digər regional infrastruktur təşəbbüsləri ilə inteqrasiyasına keçidi sürətləndirəcək.
Üç tərəf TRIPP layihəsinin bütün elementlərinin mümkün qədər tez bir zamanda tam şəkildə həyata keçirilməsinə sadiq qaldıqlarını yenidən bəyan edib.
Həmçinin oxuyun: Armenpress: Ermənistanda müxalifət TRIPP sazişinə “yox” deyəcək
