Dövlət Statistika Komitəsinin 2026-cı ilin yanvar-sentyabr məlumatına görə, Şəkidə xarici turistlərin 78 655 gecələməsindən cəmi 5 192-si mehmanxana tipli obyektlərdə qeydə alınıb. Gecələmələrin çoxu turistlərin özlərinə və ailələrinə məxsus mənzillərdə, eləcə də qohum-tanış evlərində olub.
Azərbaycan Respublikası Dövlət Statistika Komitəsinin açıqladığı hesabata əsasən, Şəki rayonunda xarici turist gecələmələrinin böyük hissəsi hotellərdən kənarda baş verib. Rəsmi göstəricilərə görə, 4 165 gecə kirayə götürülmüş mənzillərdə, 30 661 gecə isə qohum-tanışların evlərində keçirilib. Bununla yanaşı, 38 637 gecələmə turistlərin özünə və ya ailə üzvlərinə məxsus daşınmaz əmlakda qeydə düşüb.
Nəticədə, xarici turist gecələmələrinin 88,1%-i şəxsi mülkdə və ya yaxınların evində, 5,3%-i isə kirayə mənzillərdə olub. Hotel və mehmanxana tipli obyektlərin payına isə yalnız 6,6% düşüb.
Regional göstəricilərlə müqayisədə geridə qalma
Ölkə üzrə xarici turistlərin hotellərdə gecələmə faizi orta hesabla 32,2% təşkil edir. Müqayisə məqsədilə qeyd etmək olar ki, bu göstərici Qəbələ rayonunda 21,9%, Qusar rayonunda 32,8%, Naftalan şəhərində isə 54,1% səviyyəsinə çatıb. Bu fon üzərində Şəkinin hotel sektoru üzrə nəticəsi həm ümumölkə ortalamasından, həm də sadalanan digər turizm mərkəzlərindən xeyli aşağıdır.
Turizm gəlirlərində də geriləmə müşahidə olunub
Dövlət Turizm Agentliyinin avqust ayında yaydığı məlumata görə, cari ilin birinci rübündə Şəki rayonunun turizmdən əldə etdiyi gəlir 12 milyon 668,1 min manat səviyyəsində qeydə alınıb. Ötən ilin müvafiq dövründə isə bu rəqəm 19 milyon 250,7 min manat olub. Beləliklə, illik kəsimdə azalma 6 milyon 582,6 min manat, yaxud 34,2% təşkil edib.
Dövlət Turizm Agentliyinin strukturuna daxil olan Qoruqları İdarəetmə Mərkəzinin bildirdiyinə görə, cari ilin doqquz ayı ərzində Şəkinin “Yuxarı Baş” Dövlət Tarix-Memarlıq Qoruğundakı muzey və mədəniyyət obyektlərinə bilet alaraq 128 487 nəfər baş çəkib. Bu ziyarətçilərdən 56 178 nəfəri xarici qonaqlar, 72 309 nəfəri isə yerli sakinlər olub.
