48-ci Dünya Bacarıqlar Yarışı çərçivəsində Çinin Şanxay şəhərində təşkil olunan “WorldSkills Shanghai 2026” tədbirində Azərbaycan komandası kibertəhlükəsizlik sahəsində “Medal of Excellence” ödülünü qazanıb.
22–27 sentyabr tarixləri arasında baş tutan bu nüfuzlu tədbirdə dünyanın müxtəlif guşələrindən – 70-ə yaxın ölkə və regiondan – gələn 1400-ü aşan gənc mütəxəssis 64 fərqli bacarıq sahəsində öz bilik və vərdişlərini sərgiləyib. Tədbir altı əsas istiqamətə bölünərək keçirilib, Azərbaycan isə yeddi ayrı bacarıq üzrə iştirak edib: qaynaq işi, avtomobil texnologiyaları, dəmiryol nəqliyyatı, elektronika, veb texnologiyaları, aşpazlıq sənəti və kibertəhlükəsizlik.
Ölkəmizi kibertəhlükəsizlik istiqamətində Əli Məhərrəmli və Yusif Kazımlıdan ibarət ikilik təmsil edib. Onlar 702 xal toplamaqla Avstraliya, Cənubi Koreya, Braziliya, Tailand, Hindistan, Malayziya və Yaponiyanın komandalarından öndə yer alıblar.
Bu nəticə Azərbaycanın “WorldSkills” yarışlarındakı ikinci “Medal of Excellence” qazancıdır. Bundan öncə ölkəmiz 2022-ci ildə aşpazlıq sahəsində eyni mükafata sahib çıxmışdı.
Kibertəhlükəsizlik üzrə namizədlərin seçilməsi və hazırlanması işi Azərbaycan Kibertəhlükəsizlik Mərkəzinin nəzarəti altında həyata keçirilib. Seçim prosesində “Capture The Flag” formatlı mərhələlər tətbiq edilib, yekun turda isə iştirakçıların həm müdafiə, həm insidentlərə operativ reaksiya, həm də hücum texnikaları üzrə səviyyəsi qiymətləndirilib.
Elektronika sahəsində yarışan Orxan Mustafayev “Best of Nation” adına layiq görülüb, kibertəhlükəsizlik üzrə isə Zarina Təhməzova “Best CCD” kateqoriyasında mükafat qazanıb.
Tədbirin açılış hissəsində Azərbaycan nümayəndə heyətinə Peşə Təhsili üzrə Dövlət Agentliyinin rəhbəri, eyni zamanda “WorldSkills Azerbaijan” platformasının rəsmi təmsilçisi olan İlqar Bayramlı başçılıq edib.
Qeyd edilməlidir ki, ölkəmiz 2020-ci ildə “WorldSkills International” qurumuna 85-ci tamhüquqlu üzv qismində qəbul olunub, 2023-cü ildən başlayaraq isə “WorldSkills Azerbaijan” İctimai Birliyi ölkə daxilində milli təmsilçi qurum statusunda çalışır.
