Bu ilin yanvar-avqust aylarında 10 dövlət şirkətinin qeyri-neft məhsulları üzrə ixracı 758,4 milyon ABŞ dolları həcmində olub. Bu, ötən ilin müvafiq dövrü ilə müqayisədə 24,29 milyon dollar və ya 3,3 faiz çoxdur.
İqtisadi İslahatların Təhlili və Kommunikasiya Mərkəzinin məlumatına görə, sözügedən dövrdə qeyri-neft ixracında ən böyük payı, 27,33 faizlə, SOCAR-ın Marketinq və İqtisadi Əməliyyatlar İdarəsi təşkil edib. Bu qurumun ixracı 207,3 milyon dollar olsa da, əvvəlki ilin eyni dövrü ilə müqayisədə 23,87 faiz azalıb.
Reytinqdə ikinci yeri 180,6 milyon dollarlıq ixracla “AzerGold” QSC tutub, göstərici bir il əvvəlkindən 22,03 faiz yüksəkdir. “SOCAR Polymer” MMC 175,6 milyon dollarlıq ixracla üçüncü sırada qərarlaşıb, lakin bu rəqəm ötən ilə nisbətən 7,82 faiz aşağı olub.
Ən yüksək artım templərindən biri “Azərpambıq ASK” MMC-də müşahidə olunub, şirkətin ixracı 76,54 faiz artaraq 45,9 milyon dollara çatıb. “Azəralüminium” MMC-nin ixracı isə 57,78 faiz artımla 130,8 milyon dollar təşkil edib.
“SOCAR CAPE” MMC-nin ixracı 50 dəfə, “Azəripək” ASC-nin göstəricisi isə 3 dəfə artıb, bu şirkətlər ötən il çox aşağı bazadan başlayıblar. “Naxçıvan Enerji” MMC bu il ilk dəfə 0,9 milyon dollarlıq ixrac göstərici qeydə alıb.
Ümumilikdə Azərbaycanın qeyri-neft-qaz ixracı hesabat dövründə 17,6 faiz artaraq 2,81 milyard ABŞ dollarına çatıb.
