Minatəmizləmə zamanı həlak olan mütəxəssislərin valideynləri, həyat yoldaşları və övladları əmək haqqından tutulan vergi üzrə güzəşt almaq üçün hansı arayışları təqdim etməli olduqlarını artıq bilirlər. Nazirlər Kabineti bu sənədləri müvafiq siyahıya əlavə edib.
Baş nazir Əli Əsədov 1 oktyabrda 319 nömrəli qərarı imzalayıb. Qərarla 2001-ci ildə təsdiq edilmiş “Əmək haqqından tutulan vergi hesablanarkən fiziki şəxslərin vergi güzəştləri hüququnun müəyyənləşdirilməsi üçün sənədlərin Siyahısı”na yeni 1.8-1-ci bənd əlavə olunub.
Yeni bənd minatəmizləmə işləri zamanı partlayıcı sursatın işə düşməsi nəticəsində həlak olan və ya aldığı xəsarətdən sonra həyatını itirən minatəmizləyənlərin ailə üzvlərinə aiddir. Valideynlər, dul arvadlar (ərlər) və övladlar güzəşt hüququnu aşağıdakı arayışlarla təsdiq edəcəklər:
- Minatəmizləmə Agentliyinin arayışı;
- Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondunun yerli qurumunun və ya “DOST” mərkəzinin arayışı;
- Müdafiə Nazirliyinin, Fövqəladə Hallar Nazirliyinin, Daxili İşlər Nazirliyinin və Dövlət Sərhəd Xidmətinin arayışları.
Qərar 27 aprel tarixli 396-VIIQD nömrəli qanunun icrasını təmin etmək üçün qəbul olunub. Həmin qanunla Vergi Məcəlləsinə, “Təhsil haqqında” və “Minatəmizləmə fəaliyyəti haqqında” qanunlara dəyişikliklər edilmişdi.
Link: https://nk.gov.az/az/senedler/qerarlar/azerbaycan-respublikasi-nazirler-kabinetinin-2001-9803
