Fransanın Kanyü-sür-Merdəki Pyer-Oqüst Renuar Muzeyindən rəsm əsərlərinin oğurlanması ilə bağlı altı şəxs saxlanılıb. Onlardan ikisinin bilavasitə muzeyə daxil olub əsərləri götürdüyü ehtimal edilir.
Saxlanılanlar oktyabrın 7-də Alp-Dənizlər, Erö və Yura departamentlərində tutulub. Oğurluğun özü isə sentyabrın 8-də baş verib — iki şəxs Renuar Muzeyinə soxularaq dörd tablo götürüb.
Əsərlərdən ikisi, “Madam Stiven Piçonun portreti” və “Koko kitab oxuyarkən”, oğrular qaçarkən muzeyin bağında aşkarlanıb. Qalan iki iş — “Madam Kolonna Romanonun portreti” və “Quyunun yanında gənc qadın” — hələ də axtarışdadır.
Oğurlanan tabloların ümumi dəyəri ilkin hesablamalara görə 9 milyon avro təşkil edir.
Fransız rəssamı Pyer-Oqüst Renuar (1841-1919) impressionizm cərəyanının görkəmli nümayəndələrindən olub və 1874-cü ildə Parisdə keçirilən ilk impressionist sərgisinin iştirakçısı idi. O, 1907-ci ildə Domaine des Collettes mülkünü alıb və 1908-ci ilin payızından ömrünün sonuna qədər burada ailəsi ilə yaşayıb.
Hazırda Renuar Muzeyində onun rəsm və heykəl əsərləri, emalatxanası, mebelləri, molberti və şəxsi əşyaları nümayiş olunur.
