SOCAR-ın “Azneft” İstehsalat Birliyi Qərbi Abşeron yatağında tikilmiş 50 nömrəli sabit dəniz platformasını istifadəyə verib. Platformada ilk quyunun qazılması başa çatıb və hasilat artıq başlayıb.
“Azneft” İstehsalat Birliyinin yaydığı məlumata görə, yeni platformada cəmi 16 quyunun qazılması nəzərdə tutulub. Qazma və mənimsəmə işləri müasir texnologiyalar, həmçinin kompüter proqramları vasitəsilə hazırlanmış geoloji model əsasında aparılır.
Birlikdə bildirilib ki, neft-qaz yataqlarının infrastruktur tutumunun genişləndirilməsi SOCAR-ın strateji hədəflərindən biridir və bu istiqamətdə ardıcıl addımlar atılır.
Qərbi Abşeron yatağı haqqında
Qərbi Abşeron yatağı Xəzər dənizində, Abşeron arxipelaqının şimal-qərb hissəsində, Abşeron yarımadasından şimalda, Bakıdan təxminən 65 kilometr məsafədə yerləşir. Yataq 1958-ci ildə kəşf edilib və sərt iqlim-meteoroloji şəraiti ilə seçilir.
Strukturun neftliliyi məhsuldar qatın Kirmaki və Aşağı Kirmaki laylarına bağlıdır. Bu laylarda hasilat 1996-cı ildən aparılır.
