Türkiyənin Anadolu Agentliyinin yazdığına görə, İraq vasitəsilə Türkiyəni Avropa ilə birləşdirəcək Kalkınma Yolu layihəsi neft, qaz və elektrik ötürücü xətlərinin dəstəyi ilə tam mənada “enerji dəhlizi”nə çevrilə bilər və yalnız neft-qaz nəqliyyatı sayəsində ildə təqribən 80 milyard dollar həcmində iqtisadi gəlir gətirə bilər.
Agentliyin bildirdiyinə əsasən, bu qiymətləndirmə Türkiyənin Enerji və Təbii Sərvətlər naziri Alparslan Bayraktar tərəfindən İraqın Neft naziri Basim Məhəmməd Hüdeyirin rəhbərlik etdiyi nümayəndə qrupunun Ankaraya gəlişindən sonra səsləndirilib. Fars körfəzi bölgəsindən başlayaraq avtomobil və dəmiryolu vasitəsilə Türkiyə, sonra isə Avropaya çatan bu təşəbbüs İraq ilə Türkiyə arasında enerji sahəsində sıx bağlılıq yaratmaqla yanaşı, qlobal miqyasda mühüm ticarət dəhlizinə çevrilməyi nəzərdə tutur.
Nəşrin məlumatına görə, Bayraktar vurğulayıb ki, layihə sadəcə nəqliyyat əlaqəsi kimi qalmayacaq, əksinə marşrut boyunca çəkiləcək neft, qaz və elektrik ötürücü şəbəkələri ilə möhkəmləndirilərək strateji əhəmiyyətli bir enerji marşrutu kimi həyata keçiriləcək. Onun sözlərinə görə, bu infrastrukturun paralel və əlaqəli şəkildə qurulması marşrutun gətirəcəyi iqtisadi faydanı xeyli yüksəldəcək.
Agentlik qeyd edib ki, nazirin fikrincə, bu yol üzərindən sutkada 2,5 milyon barelə yaxın neft nəqli üçün imkan yaradıla bilər. Qeyd olunub ki, İraqda gündəlik neft hasilatı təxminən 4 milyon barel, Küveytdə isə 2 milyon barel səviyyəsindədir və bu hasilatın 40-50 faizinin söhbətgedən marşruta yönəldilməsi nəticəsində illik iqtisadi həcmin 65-70 milyard dollara qədər yüksələ biləcəyi bildirilib.
Anadolu Agentliyinin məlumatına görə, layihənin qaz baxımından da ciddi imkanları var – Qətərin təbii qazının Hörmüz boğazını əhatə etməyən yollarla, yəni İraq ərazisindən keçərək Türkiyəyə, oradan isə Avropaya ötürülməsi variantı nəzərdən keçirilir. Bayraktarın qeyd etdiyinə görə, neft və qaz amillərinin birlikdə hesablanması layihənin illik iqtisadi dəyərini 80 milyard dollar səviyyəsinə çatdırır.
Nəşr onu da bildirib ki, Kərkük-Ceyhan boru xəttinin Basraya qədər genişləndirilməsi və ötürücülük imkanlarının artırılması Fars körfəzi istiqamətinə ciddi alternativ formalaşdıracaq. Bayraktar diqqətə çatdırıb ki, İraqın yeni hökuməti ilə sıx qarşılıqlı fəaliyyət çərçivəsində, Baş nazir Əli əz-Zeydi tərəfindən elan edilmiş gündəlik 1 milyon barel həcmində xam neft təchizatı məqsədinə nail olmaq və Ceyhanı dünya səviyyəli enerji mərkəzinə çevirmək niyyətindədirlər.
