Asiya İnkişaf Bankı Azərbaycanın paylayıcı elektrik şəbəkəsinin modernləşdirilməsi və rəqəmsallaşdırılması üzrə texniki-iqtisadi əsaslandırma hazırlamaq üçün beynəlxalq konsaltinq şirkəti cəlb edəcək. Xidmətin büdcəsi 350 min ABŞ dolları təşkil edir.
Müqavilənin icra müddəti 12 ay olacaq, işlərin təxmini başlama tarixi isə 2027-ci il 18 yanvardır. Layihənin icraçı və həyata keçirici qurumu “Azərişıq” ASC olacaq.
Seçiləcək məsləhətçi şirkət ölkənin elektrik paylayıcı infrastrukturunun müasirləşdirilməsi və rəqəmsallaşdırılması üçün texniki-iqtisadi əsaslandırma hazırlayacaq. Sənəddə 110 kV və 35 kV gərginlikli rəqəmsal yarımstansiyaların, habelə onlarla bağlı elektrik veriliş xətlərinin tikintisi və yenilənməsi nəzərdə tutulur.
Layihə çərçivəsində məsafədən idarə olunan paylayıcı transformator məntəqələrinin və orta/aşağı gərginlikli xətlərin quraşdırılması, dispetçer idarəetməsi və məlumat toplama sistemlərinin (SCADA), telekommunikasiya infrastrukturunun, ADMS sistemlərinin və intellektual uçot (AMI) texnologiyalarının tətbiqi planlaşdırılır. Bundan əlavə, elektrik itkilərinin azaldılması və şəbəkənin bərpa olunan enerji mənbələrinin inteqrasiyasına qarşı dayanıqlığının artırılması üzrə tədbirlər də işə daxil ediləcək.
Məsləhətçi şirkət texniki, iqtisadi, maliyyə, ekoloji və sosial risklərin, o cümlədən iqlim dayanıqlığı və rəqəmsal təhlükəsizlik məsələlərinin qiymətləndirilməsini aparacaq. Həmçinin satınalma planının hazırlanması və “Azərişıq”ın heyətinin institusional inkişafı üçün ayrıca proqramın tərtib edilməsi nəzərdə tutulub.
