Paytaxtda qadağan olunmuş platformalar vasitəsilə qeyri-qanuni mərc və qumar oyunları təşkil edən dəstənin fəaliyyətinə son qoyulub. İlkin hesablamalara əsasən, qrupun maliyyə dövriyyəsi 5 milyon manatdan artıq olub.
Daxili İşlər Nazirliyinin Kibercinayətkarlığa Qarşı Mübarizə Baş İdarəsinin işçiləri apardıqları əməliyyat nəticəsində altı nəfəri – Xaqani Əlizadə, Vüsal Tağıyev, Asim Zeynal, Emin Mahmudov, Sultanəli Bayramov və Tural Kərimlini – müəyyən edərək saxlayıblar.
İstintaqın gəldiyi qənaətə əsasən, bu şəxslər Bakının Yasamal rayonunda bir mənzil icarəyə götürüb və ölkə ərazisində bloklanmış chckeeper.net saytından istifadə edərək “Tilk007”, “Rahat001” və “Rahat98” adlı virtual ödəniş kassaları yaradıblar.
Məlum olub ki, “Jaguar casino” və “Rahat casino” adlanan profillər üzərindən qeyri-qanuni bahis və qumar oyunları həyata keçirilib. Oyunçuların cəlbi və pul vəsaitlərinin qəbulu məqsədilə WhatsApp və Telegram proqramlarından istifadə olunub.
Mənzildə aparılan axtarış zamanı 55 mobil telefon, 177 bank kartı, həmçinin digər rəqəmsal yaddaş vasitələri və sübut əhəmiyyəti daşıyan materiallar aşkarlanaraq götürülüb.
Nazirliyin verdiyi məlumata görə, saxlanılan şəxslərin qeyri-qanuni onlayn oyun biznesini idarə edərkən həyata keçirdikləri maliyyə əməliyyatlarının ümumi məbləği 5 milyon manatı keçib.
Bu faktla əlaqədar Baş İdarədə Cinayət Məcəlləsinin müvafiq maddələri üzrə cinayət işi başlanıb. Hər altı şəxs təqsirləndirilən qismində işə cəlb olunub, məhkəmənin verdiyi qərarla onlara həbs qətimkan tədbiri seçilib.
Nazirlik bildirib ki, araşdırma davam etdirilir, hadisənin bütün tərəfləri, qeyri-qanuni fəaliyyətin mexanizmi və iştirakçıların pul hərəkətləri hazırda dəqiqləşdirilir.
