Fransanın tanınmış aktrisası, müğənni və yazıçı Marina Vladi 88 yaşında vəfat edib. Bu barədə məlumatı onun ailəsi AFP agentliyinə çatdırıb.
Aktrisa ötən gün öz evində, ailə üzvləri və ev heyvanlarının yanında dünyasını dəyişib. Övladları anasının ömrünü “uzun, gözəl və mənalı” olaraq təsvir ediblər.
Marina Vladinin əsl adı Yekaterina-Marina Polyakova-Baydarovadır. O, 1938-ci il mayın 10-da Fransanın Klişi şəhərində rus mühacir ailəsində dünyaya göz açıb. Kinoya 16 yaşında qədəm qoyan aktrisa, Andre Kayattın “Avant le déluge” filmindəki roluna görə perspektivli gənc aktrisalara verilən Syuzan Byanşetti mükafatını alıb.
1963-cü ildə “Le Lit conjugal” filmindəki çıxışına görə Kann Film Festivalının ən yaxşı aktrisa mükafatını qazanan Vladi karyerası boyu 80-dən artıq filmdə çəkilib. 1970-ci illərdə isə bir neçə məşhur komediya filmində rol alıb.
Aktrisanın fəaliyyəti sənətin digər sahələrinə də yayılıb. Bacıları ilə birgə “Les Sœurs Poliakoff” adı ilə iki musiqi albomu buraxan Vladi, eyni zamanda təxminən on kitabın müəllifi olub. Bu əsərlər arasında 1987-ci ildə çap olunan və rus şairi Vladimir Vısotski ilə münasibətlərindən bəhs edən “Vladimir ou le vol arrêté” kitabı xüsusi yer tutur.
Marina Vladi 1969-cu ildə Vladimir Vısotski ilə ailə qurub. Şairin 1980-ci ildəki vəfatına qədər onunla Moskvada yaşayıb.
