Qubadlı rayonunda Bərgüşad çayı üzərində gücü 5,3 meqavat olan “Eyvazlı” Su Elektrik Stansiyası tikilir. “AzərEnerji” Açıq Səhmdar Cəmiyyəti tərəfindən inşa edilən obyekt rayonda yaradılacaq ilk belə stansiya olacaq.
“AzərEnerji”nin məlumatına görə, stansiyanın dayanıqlı su təminatı üçün Bərgüşad çayı üzərində ekoloji tələblərə cavab verən baş suqəbuledici qurğu tikilib. Mürəkkəb relyefdən keçən 5,3 kilometrlik derivasiya boru xətti çəkilib, maşın zalının tikintisi isə artıq tamamlanıb.
Hazırda obyektdə turbin və generatorların, habelə 35 və 10 kilovoltluq qapalı paylayıcı qurğuların quraşdırılması davam edir. “Eyvazlı” SES iki “Frensis” tipli turbinlə təchiz olunacaq, tikinti-quraşdırma işlərinin isə yaxın müddətdə başa çatdırılması planlaşdırılır.
Yeni stansiya 2021-ci ildə istifadəyə verilmiş 110 kilovoltluq “Qubadlı” yarımstansiyası üzərindən ölkənin vahid enerji şəbəkəsinə qoşulacaq. Beləliklə, Qubadlı da işğaldan azad olunmuş ərazilər arasında yaşıl hidroenerji istehsal edən rayonların sırasına daxil olacaq.
İllik enerji istehsalı nə qədər olacaq
Stansiyanın istismara verilməsindən sonra ildə 15,6 milyon kilovat-saat təmiz enerji istehsal olunması gözlənilir. Bu, həmçinin 3,5 milyon kubmetr təbii qazın qənaət edilməsinə və atmosferə 6400 ton karbon qazı emissiyasının qarşısının alınmasına imkan verəcək.
