“Azərbaycan Hava Yolları” (AZAL) QSC cari ilin yanvar-oktyabr aylarında 3 661 630 sərnişin daşıyıb ki, bu da keçən ilin eyni dövrünə nisbətən 6 faiz çoxdur. Şirkətin kommersiya direktoru Cəmil Manizadənin açıqlamasına əsasən, yaranan əlavə sərnişin axınının təxminən 90 faizini Bakı üzərindən keçən tranzit yolçular təşkil edib.
AZAL-ın açıqladığı rəqəmlərə görə, 10 aylıq dövrdə ümumi sərnişin sayı əvvəlki ilə nisbətən 193 219 nəfər çoxalıb. Eyni dövrdə yerinə yetirilən reyslərin sayı da 8 faiz artaraq 31 481-ə yüksəlib, bu isə 2025-ci ilin müvafiq göstəricisindən 2 204 reys çoxdur.
Tranzit sərnişinlərin sayı 23 faiz artımla 172 925 nəfər çoxalaraq 924 078-ə yüksəlib. Bununla da ümumi daşımalarda transfer yolçuların payı 22 faizdən 25 faizə qalxıb – yəni AZAL-la uçan hər dörd sərnişindən biri hazırda Bakı üzərindən tranzit keçir.
Cəmil Manizadə qeyd edib ki, ilin ilk on ayında paytaxt aeroportundan keçən tranzit reyslərlə gündə ortalama 3 mindən çox sərnişin səyahət edib. Bu göstərici əvvəlki ilin müvafiq rəqəmindən təxminən 570 nəfər yüksəkdir.
Regional istiqamətlərdə artım tempi
Bakı aeroportundan keçən bir sıra regional marşrutlarda tranzit sərnişin sayı qat-qat artıb. Dehli-Tbilisi xəttində 12 851 sərnişin qeydə alınıb ki, bu 18,6 dəfəlik artıma bərabərdir, Kişineu-Dehli istiqamətində isə 6 408 sərnişinlə 9,6 dəfəlik yüksəliş müşahidə olunub. Almatı-Ciddə marşrutunda sərnişin sayı 7 792-yə çatıb (341 faiz artım), Dehli-Təl-Əviv xəttində isə bu rəqəm 9 773-ə yüksəlib (176 faiz artım).
Oktyabr ayı ərzində beş əsas marşrut üzrə də yüksəliş davam edib: Dehli-Tbilisi xəttində 1 404 sərnişin (527 faiz artım), Astana-Tbilisi istiqamətində 1 270 sərnişin (290 faiz artım), Dehli-Təl-Əviv marşrutunda 1 757 sərnişin (104 faiz artım), Kişineu-Dehli xəttində 1 015 sərnişin (915 faiz artım) və yeni açılan Ciddə-Şımkənd istiqamətində 1 122 sərnişin daşınıb. Bu beş marşrut üzrə oktyabrdakı ümumi tranzit axını 6 568 nəfərə çatıb ki, bu da ötən ilin eyni ayındakı 1 510 nəfərlik göstəricidən dörd dəfədən çox yüksəkdir.
Bundan başqa, aviaşirkət yanvar-oktyabr dövründə bütün uçuş parkı üzrə gündəlik orta uçuş vaxtını 8,9 blok-saatdan 9,8 blok-saata qədər yüksəldib. İcarəyə götürülmüş ekipajlı təyyarələr istisna olmaqla, “Airbus” tipli hava gəmilərində bu göstərici 9,3 saatdan 11 saata qədər artıb.
