Qazaxıstanın Almatı şəhərində baş tutan tədbirdə azərbaycanlı alim Rafiq Əliyev süni intellekt və qeyri-səlis məntiq sahəsindəki nailiyyətlərinə görə Türk Dünyası Elm Mükafatına layiq görülüb.
8 oktyabrda Beynəlxalq Türk Dünyası Elm Mükafatları Komitəsinin təşkilatçılığı ilə Almatıda elmi mükafatlandırma mərasimi keçirilib. Tədbirin məqsədi Türk dünyasının müxtəlif elm sahələrində beynəlxalq səviyyəli nəticələr əldə etmiş tədqiqatçılarını üzə çıxarmaq və onları təltif etməkdir.
Tədbirdə qonaq qismində iştirak edən özbəkistanlı akademik Yusifbəyovun bildirdiyinə görə, Rafiq Əliyevə bu mükafat bulanıq (fuzzy) riyazi məntiq və süni intellekt üzrə dünya elmi ictimaiyyəti tərəfindən tanınmış tədqiqatlarına görə verilib.
Nizami Gəncəvidən misra səsləndirdi
Mükafatını aldıqdan sonra Rafiq Əliyev ilk olaraq Azərbaycan və Türkiyə türkcəsində, sonra isə ingilis dilində çıxış edib. Çıxışında Türk dünyasının sabahının elmdən və təhsildən asılı olduğunu vurğulayan alim, Nizami Gəncəvinin məşhur beytini xatırladıb: elmin gücü əsas üstünlük mənbəyidir və bundan başqa heç kim heç kimə üstün gələ bilməz.
Akademik Yusifbəyovun sözlərinə əsasən, Rafiq Əliyev daha əvvəl qazandığı SSRİ Dövlət mükafatı və ABŞ-ın Elmdə Ömürlük Uğur mükafatının dəyərini qeyd etsə də, bu dəfəki təltifin onun üçün qan yaddaşı və kök baxımından daha yaxın olduğunu vurğulayıb. Çıxışının sonunda alim mükafatın təşkilində rol oynayan şəxslərə və mərasimə qatılan dünya alimlərinə minnətdarlığını bildirib.
Rafiq Əliyevin həmin çıxışı Türkiyə mətbuatında da yer alıb. Türk Dünyası Elm Ödülləri Təşkilat Komitəsinin sədri Cemal Akkuş isə öz çıxışında bu mükafatları Türk dünyasının Nobel mükafatı kimi dəyərləndirib.
