Azərbaycan Ordusunun hərbi pilotları Su-25 ML hücum və L-39 təlim təyyarələrində hava kəşfiyyatı və pilotaj manevrləri üzrə təlim tapşırıqlarını yerinə yetiriblər. Bu barədə Müdafiə Nazirliyi məlumat yayıb.
Müdafiə Nazirliyinin açıqlamasına görə, təlimə hazırlıq mərhələsində pilotların uçuş şəraiti və təhlükəsizlik qaydaları üzrə nəzəri bilikləri yoxlanılıb, şəxsi heyətə müvafiq təlimatlar çatdırılıb. Uçuş heyətinin sağlamlıq vəziyyəti müayinədən keçirildikdən sonra hərbçilər Su-25 ML hücum və L-39 təlim təyyarələrinə nəzarət baxışı aparıblar.
Təlim zamanı pilotlar havaya qalxma və enmə texnikalarını, müxtəlif hündürlüklərdə pilotaj manevrlərini icra ediblər. Bundan əlavə, şərti düşmənə aid yerüstü hədəflərin koordinatları müəyyənləşdirilib, hava kəşfiyyatı tapşırıqları yerinə yetirilib.
Müdafiə Nazirliyi bildirib ki, bu cür təlim uçuşlarının məqsədi şəxsi heyətin döyüş hazırlığını artırmaq və ölkənin hava məkanında meydana çıxan yeni təhdidlərə qarşı uçuş bacarıqlarını gücləndirməkdir.
