Donald Tramp ilə Si Cinpinin görüşündən sonra ABŞ ilə Çin bir-birinə qarşı tətbiq etdikləri gömrük tariflərini 30 milyard dollar məbləğində azaltmaq barədə anlaşmaya varıb. Xəbər Çinin Xarici İşlər Nazirliyinin internet səhifəsində yayımlanıb.
ABŞ Prezidenti Donald Tramp və Çin lideri Si Cinpinin keçirdiyi görüşün ardından iki ölkə arasında qarşılıqlı tarif güzəştləri barədə saziş imzalanıb. Sazişə əsasən, endirimin ümumi məbləği 30 milyard dolları təşkil edəcək.
Çin Xarici İşlər Nazirliyinin yaydığı bəyanatda qeyd olunub ki, hər iki dövlət rəhbəri Çin-ABŞ arasındakı ticarət-iqtisadi məsləhətləşmə mexanizmi çərçivəsində aparılan danışıqları, habelə tərəflərin ticarət nümayəndə heyətlərinin gördüyü işləri uğurlu hesab edib.
Bundan əlavə, taraflar Ticarət Şurası adlanan yeni əməkdaşlıq formatlarının qurulması və genişləndirilməsi istiqamətində fikir birliyinə gəlib. Eyni zamanda, Kuala-Lumpur şəhərində baş tutmuş ticarət-iqtisadi danışıqlar zamanı qazanılan nəticələrin qüvvəsinin daha uzun müddət saxlanılması qərarlaşdırılıb.
Fox News telekanalının Ağ Evə əsaslanaraq verdiyi məlumata görə, ABŞ tərəfindən aşağı salınan tariflər əkinçilik məhsulları, balıqçılıq və dəniz sərvətləri, işlənməmiş ağac materialları, ətriyyat malları ilə yanaşı tibbi avadanlığın da xaricə göndərilməsinə şamil ediləcək. Çin isə öz növbəsində xırda ev əşyaları, uşaq oyuncaqları, bayram üçün dekorativ məhsullar və körpə avtomobil kreslolarının ölkəyə gətirilməsində güzəştlər tətbiq edəcək.
Mənbə: Banker.az
